धादिङ । धादिङ जिल्लाको दुर्गम पहाडी क्षेत्र रुबी भ्याली ग्रामीण नगरपालिकामा सञ्चालन गरिएको विद्यालय केन्द्रित एकीकृत स्वास्थ्य शिविरबाट सयौं विद्यार्थी र स्थानीय लाभान्वित भएका छन् । ॐ समाज दन्त अस्पताल, सेचेन करुणा र रुबी भ्याली आधारभूत अस्पतालको सहकार्यमा कन्यादेवी आधारभूत विद्यालय, खर्सा गाउँ आधारभूत विद्यालय र च्याम्रा देवी माध्यमिक विद्यालयमा स्वास्थ्य शिविर सञ्चालन गरिएको थियो ।

दुर्गम गाउँहरूमा स्वास्थ्य सेवा सजिलै उपलब्ध नभएको बेला आफ्नै गाउँ र विद्यालयमा विशेषज्ञ सेवा पुगेपछि स्थानीयहरू उत्साहित भएका थिए । शिविरमा सामान्य स्वास्थ्य जाँच, दन्त जाँच र उपचार, आँखा जाँच, कान-नाक-घाँटी परीक्षण, पोषण परीक्षण, हेमोग्लोबिन परीक्षण, भिडियो एक्स-रे र आवश्यक औषधि वितरण सेवाहरू प्रदान गरिएको थियो । थप उपचार आवश्यक पर्ने बिरामीहरूलाई रेफरल सेवाहरू पनि प्रदान गरिएको आयोजकहरूका अनुसार विशेष गरी दन्त स्वास्थ्य सेवाहरूमा दाँत भर्ने, सडेको दाँत सफा गर्ने, दाँत निकाल्ने र मौखिक स्वास्थ्य परामर्श सेवाहरू समावेश थिए ।

धेरै बालबालिका र स्थानीयले पहिलो पटक विशेषज्ञ दन्त सेवा प्राप्त गरे। दन्त चिकित्सक आशिका न्यौपानेले स्थानीय बालबालिकामा दाँतको समस्या गम्भीर रहेको बताइन्। उनले भनिन्, “हामीले दुई दिनमा पाँच विद्यालयका विद्यार्थीहरूको दाँत जाँच गरेका छौं । पहिलो दिन १२२ विद्यार्थीहरूको जाँच गरिएको थियो, जसमध्ये ४८ दाँत निकालिएको थियो भने ३१ जनाको दाँत भरिएको थियो ।

दोस्रो दिन २२६ विद्यार्थीहरूको जाँच गरिएको थियो र ५९ जनाको दाँत निकालिएको थियो भने ३९ जनाको दाँत भरिएको थियो। स्थानीय बालबालिकामा दाँतको समस्या गम्भीर रहेको देखिन्छ ।” उनले नियमित ब्रस गर्ने बानी, सरसफाइ र समयमै उपचारको आवश्यकता पनि औंल्याइन् । त्यस्तै, दन्त चिकित्सक दीक्षा चौधरीले दुर्गम गाउँमा पुगेर सेवा प्रदान गर्नु विशेष अनुभव भएको बताइन्। उनले भनिन्, “कठिन यात्राको बावजुद पनि स्थानीयको माया, सम्मान र मुस्कानले सबै थकान मेटाइदियो। यस्ता क्षेत्रमा अझै पनि स्वास्थ्य सेवाको आवश्यकता छ ।”

दन्त सहायक जुनु पण्डितले स्थानीयको न्यानो स्वागत धेरै प्रेरणादायी भएको बताइन्। उनले भने, “विशेषज्ञ सेवा प्राप्त गरेपछि दुर्गम गाउँका नागरिकहरूले देखाएको खुशी हाम्रो सबैभन्दा ठूलो उपलब्धि हो ।” आँखा जाँच सेवा प्रदान गर्ने मनोरथ खातीले बालबालिकामा बढ्दो आँखा समस्या र नियमित जाँचको आवश्यकता उल्लेख गरे। उनले भने, “केही बालबालिकाको पहिलो पटक आँखा जाँच गरिएको छ। दुर्गम क्षेत्रमा समयमै स्वास्थ्य सेवामा पुग्नु धेरै महत्त्वपूर्ण छ ।”

ईएनटी विशेषज्ञ सुदन अधिकारीले बालबालिकामा नाक, कान र घाँटीको समस्याको संख्या अपेक्षा गरेभन्दा बढी रहेको जानकारी दिए। त्यस्तै, संजिता केसीले शिविरमा धेरै स्वास्थ्य समस्याहरू पहिचान गरिएको र दुर्गम क्षेत्रमा नियमित स्वास्थ्य सेवाको आवश्यकता रहेको औंल्याइन् । सुष्मा तामाङ र कुमारी बिकेले प्रयोगशाला परीक्षणमा प्रमुख भूमिका खेले । शिविरको नेतृत्व सामाजिक कार्यकर्ता तथा पत्रकार राजन थापाले गरेका थिए । उनले ग्रामीण क्षेत्रमा स्वास्थ्य सेवा प्रदान गर्नु मानवताप्रतिको जिम्मेवारी भएको बताए । उनका अनुसार गत वर्ष सञ्चालन गरिएका २०० भन्दा बढी स्वास्थ्य शिविरहरूमध्ये रुबी भ्याली शिविर एक विशेष र भावनात्मक अनुभव बनेको छ ।

कार्यक्रमलाई प्रभावकारी बनाउन सेचेन करुणाले सहकार्य गरे। संस्थाका कार्यक्रम प्रबन्धक दीपेन्द्र पन्तले टोलीले दुर्गम क्षेत्रहरूमा पुगेर सेवा प्रदान गर्नु गर्वको कुरा भएको बताए । उनले भने, "दुर्गम गाउँहरूमा पुगेर सेवा प्रदान गर्नु हाम्रो लागि ठूलो सम्मानको कुरा हो । यहाँका स्थानीयहरूको मुस्कान र विश्वासले हामीलाई भविष्यमा अझ धेरै काम गर्न प्रेरित गरेको छ ।"

त्यस्तै, टेक बहादुर खड्काले रुबी भ्यालीका अधिकांश विद्यालयहरूलाई भवन निर्माणदेखि कृषिका लागि आवश्यक पर्ने विद्यालय सामग्री, कुर्सी र बीउबिजनसम्म निरन्तर सहयोग गरिएको बताए । उनले भने, "दुर्गम क्षेत्रमा शिक्षा र स्वास्थ्य सुधार गर्न सबै पक्षले सहकार्य गर्नुपर्छ । भविष्यमा पनि हाम्रो सहयोग जारी रहनेछ ।" कठिन पहाडी भूभाग, जोखिमपूर्ण सडक र सीमित स्रोतसाधनका बाबजुद पनि स्वास्थ्य टोली गाउँ पुगेको छ ।

स्थानीयका अनुसार यस्ता शिविरहरूले स्वास्थ्य सेवा मात्र नभई दुर्गम गाउँहरूमा सेवा भावना, मानवता र सामाजिक उत्तरदायित्वको सन्देश पनि ल्याएको छ । स्थानीयहरूले आफ्नै गाउँमा विशेषज्ञ सेवा प्राप्त गरेपछि धेरै बालबालिका र वृद्धवृद्धाको अनुहारमा खुशी र आशा देखेको बताए ।